你的位置:文匯資訊 >> 資訊 >> 香港 >> 賽馬 >> 詳細內容 在線投稿

騎練軍情:實力飛駒備戰認真

收藏 發給朋友 來源: 香港文匯報   發佈者:石岐生
熱度263票  瀏覽29338次 時間:2016年4月27日 21:46

跑馬講實力,當然係成功條件之一,但如果冇運氣,有實力亦唔可以話贏就贏,好似上周日女皇盃,雷神替日本隊隻「朗月清天」披甲,三隻日隊馬中實力最高強一駒,過江龍亦非常醒目,搵定雷神幫拖,正所謂萬事俱備,只要正常場地,冠軍可以話手到拿來咁滯,誰不知開賽未幾便大雨滂沱,造就今屆新鮮出爐打吡冠軍「明月千里」贏這場國際一級賽,但大又諗唔諗到,呢隻馬贏來姿態竟然視一批日本隊如無物,難怪賽後雷神都呻,一場大雨將女皇盃夢粉碎。所以話冇贏梗嘅馬,贏面高嘅馬就有,例如今次夜賽咁,角逐跑馬地窄場,一個唔好彩,抽得外檔起步,實力高一班亦未必贏得,好彩今次蘇保羅一對實力馬「實力飛駒」(圖7號)及「活力小駒」均抽得唔錯檔位,屆時係有最佳爭勝機會。

周一排位日下午,倉主安排呢兩隻馬到機坪踱步,「實力飛駒」由副練伍鵬志親自踱步,「活力小駒」則用一位外籍助手,兩隻馬於機坪踱咗十多分鐘,「活力小駒」全程谷起雞公頸,火氣十足,至於「實力飛駒」,馬身肌肉紮實如鐵,狀態惹人好感,大約三點半鐘左右,兩隻馬踱步工夫做完,馬房又安排佢哋齊齊坐運馬車遊車河,雖然呢兩隻馬經已有谷戰經驗,但呢個坐馬車動作,一般用嚟提示馬匹,將會坐車出市區作賽,希望提高其競賽意慾,呢個安排收效往往唔錯。當兩匹戰馬坐運馬車遊車河期間,倉主打聽呢兩隻馬今日出市區時間,副練回答會坐第一班九點半車出市區,蘇保羅得知後,命副練將呢兩隻馬出市區時間改為下午一點半至兩點半尾班車,原來呢兩隻馬今日出跑馬地前,馬房會再安排兩駒喺馬房地堂踱步,熱完一輪身,然後稍事休息才安排運赴市區,睇蘇保羅呢個安排,當知佢幾咁重視呢兩隻實力馬。

牛魔王蔣嘉琦摸實

蔣嘉琦處處受人呵護,唔少練馬師都專登俾啲實力馬佢跑,搞到佢近期好似女神童咁,點石會成金,例如上個禮拜日,贏徐雨石隻「魅力之子」,起步麻麻,但入到直路如狂風掃落葉,一條直路逢馬過馬贏晒,識睇馬一族,就此可以睇到,係贏在小妹功夫好,抑或練馬師功力,不過點都好,小妹多人錫,本身又交得準,點都有馬房大力支持。又例如告達理馬房,上個禮拜尾場隻「神威敖翔」,臨場起票到四倍,呢匹上二班冇幾耐馬,憑兩滴雨水希望有地利之助制敵,可惜最終落敗。雖然小妹未能再替告達理建得奇功,但今次夜賽,依然受馬房重用,其中一匹五班馬「牛魔王」,呢兩日勤見小妹入倉睇馬兼操練。

周一排位日大約六點鐘左右,「牛魔王」蔣嘉琦與「摯跑得」告達理於地堂踱步,踱畢又安排教閘,呢朝踱完,午間又再安排呢兩隻馬喺地堂拍踱,備戰一絲不苟,由於早上經已搵蔣嘉琦替隻「牛魔王」踱過步,故下午打孖操練時,蔣小妹經已唔使同呢隻馬再細心踱步,呢隻「牛魔王」喺倉主心目中屬非常重視之馬。至於另一隻由告達理經常摸住踱步嘅「摯跑得」,大告近呢兩日亦經常摸住,亦係倉主緊張嘅馬,一對告廄五班分子,隨時有機會替馬房贏個孖寶。

免責聲明:本文僅代表作者個人觀點,與文匯網無關。文中陳述內容及其原創性未經本站證實,對本文以及其中全部或者部分內容、文字的真實性、完整性、及時性本站不作任何保證或承諾,請讀者僅作參考,并請自行核實相關內容。
上一篇 下一篇